கும்பகோணம் மாநகராட்சி களப்பணியாளர்கள் 600 பேருக்கு தீபாவளிப் பரிசுத் தொகுப்பு! அமைச்சர் ர. வினோத் வழங்கி, தீபாவளி நல்வாழ்த்துக்கள் தெரிவித்தார்

கும்பகோணம் மாநகராட்சி களப்பணியாளர்கள் 600 பேருக்கு தீபாவளிப் பரிசுத் தொகுப்பு!

அமைச்சர் ர. வினோத் வழங்கி, தீபாவளி நல்வாழ்த்துக்கள் தெரிவித்தார் 

கும்பகோணம், நவ. 7 -

தீபாவளிப் பண்டிகையை முன்னிட்டு, கும்பகோணம் மாநகராட்சியில் பணிபுரியும் பாதாளச் சாக்கடைப் பணியாளர்கள், தெருவிளக்கு பராமரிப்புப் பணியாளர்கள், துப்புரவுப் பணியாளர்கள், குடிநீர் விநியோகப் பணியாளர்கள் உள்ளிட்ட ஆண்கள் மற்றும் பெண்கள் என 600 களப்பணியாளர்களுக்கு வேட்டி, புடவை மற்றும் இனிப்புகள் அடங்கிய தீபாவளிப் பரிசுத் தொகுப்புகளை வேளாண்மை மற்றும் உழவர் நலத்துறை அமைச்சர் ர. வினோத் வழங்கினார்.

கும்பகோணம் சட்டப்பேரவை அலுவலகத்தில் நடைபெற்ற நிகழ்ச்சியில் பங்கேற்ற அமைச்சர், 600 களப்பணியாளர்களுக்கும் பரிசுத் தொகுப்புகளை வழங்கி, தீபாவளி நல்வாழ்த்துகளைத் தெரிவித்தார்.

தொடர்ந்து, களப்பணியாளர்களுடன் கலந்துரையாடிய அமைச்சர், அவர்களின் கோரிக்கைகள் மற்றும் குறைகளைக் கேட்டறிந்தார். அவற்றை உரிய முறையில் பரிசீலித்து, தேவையான நடவடிக்கைகள் மேற்கொள்ளப்படும் என்றும் உறுதியளித்தார்.கும்பகோணம் மாநகரின் தூய்மை, சுகாதாரம், குடிநீர் விநியோகம் உள்ளிட்ட அத்தியாவசியப் பணிகளில் இரவு, பகல் பாராமல் ஈடுபட்டு வரும் களப்பணியாளர்களுக்கு தீபாவளிப் பரிசுத் தொகுப்புகள் வழங்கப்பட்டது அவர்களிடையே மகிழ்ச்சியை ஏற்படுத்தியது.

செய்தியாளர் அ.மகேஷ்