தற்போதைய கல்வி முறைக்கு இடையூறு ஏற்படுத்தும் தேசிய கல்விக்கொள்கை இடைநிற்றலை அதிகரித்துவிடும்: ஐகோர்ட்டில் அரசு பதில்

தற்போதைய கல்வி முறைக்கு இடையூறு ஏற்படுத்தும் வகையில் உள்ள தேசிய கல்விக் கொள்கை  இடை நிற்றலை அதிகரிக்கும்  என்று தமிழக அரசு சென்னை உயர் நீதிமன்றத்தில் தெரிவித்துள்ளது. 

தமிழகத்தில் தேசிய கல்விக்கொள்கையை அமல்படுத்தக் கோரி அர்ஜுனன் இளையராஜா என்பவர் சென்னை உயர் நீதிமன்றத்தில் வழக்கு தொடர்ந்திருந்தார். இந்த வழக்கு தலைமை நீதிபதி முனீஸ்வர் நாத் பண்டாரி, நீதிபதி மாலா ஆகியோர் அடங்கிய அமர்வில் விசாரணைக்கு வந்தது. இந்த வழக்கில் தமிழக தலைமைச் செயலாளர், உயர் கல்வி மற்றும் பள்ளிக்கல்வித் துறை செயலாளர்கள் சார்பில் பதில் மனு தாக்கல் செய்யப்பட்டுள்ளது.அதில், கல்வி என்பது மாநில கொள்கை. தேசிய கல்விக் கொள்கை என்பது எந்த சட்டப்பூர்வ அங்கீகாரமும் இல்லாத வரைவு கொள்கையாக உள்ளது.

 தேசிய அளவில் மாணவர் சேர்க்கை விகிதத்தை 27.1 சதவீதத்தில் இருந்து 2035ல்  50 சதவீதமாக உயர்த்தும் எண்ணத்தில் தேசிய கல்விக் கொள்கை கொண்டு வரப்பட்டதாக கூறும் நிலையில், இலவச கல்வி, மதிய உணவு, இலவச புத்தகம்,  சீருடை, சைக்கிள், காலணி, லேப் டாப், உதவித்தொகை மூலம் 51.4 சதவீத சேர்க்கை  விகிதத்தை எட்டி, தமிழகம் 15 ஆண்டு முன்னோக்கி பயணிப்பதாகவும் பதில்  மனுவில் தெரிவிக்கப்பட்டுள்ளது. தற்போதைய கல்வி முறைக்கு இடையூறு ஏற்படுத்தும் வகையில் உள்ள தேசிய கல்விக் கொள்கை  இடை நிற்றலை அதிகரிக்கும். மேலும் மாநில கல்விக் கொள்கையை வகுக்க டெல்லி உயர் நீதிமன்ற ஓய்வுபெற்ற தலைமை நீதிபதி முருகேசன்  தலைமையில் குழு அமைக்கப்பட்டுள்ளது. எனவே, இந்த வழக்கு விசாரணைக்கு உகந்ததல்ல என்பதால் அபராதத்துடன் தள்ளுபடி செய்ய வேண்டும் என்று கூறப்பட்டிருந்தது.வழக்கை விசாரித்த நீதிபதிகள் விசாரணையை இரு வாரங்களுக்கு தள்ளிவைத்தனர்.